ديوان مُرقـاد الدَرنٌـقَـلْ( لقصـائد الباديـه)خـالـد فـزازى

الحكـامـة لبست عِــمٌــه ... خـالـد الـفــزازى

نـبـحــتْ كــلاب الـهــو ..
فـوق للحمـير الراويـة ..
الليلـة صبحت رِمـة ..
الطـرحــة .. الشــفــون ..
مـا بتبـقـى تـبْ زى عـمـة ..
والـزول الضكــر ..
مـا ببقــى تـابـع الرمــة ..
وكـان تـفْ الخشـم ..
كـومـة تـراب بتلــمــه ..
مـبـروك يا الحـريـم ..
الحكـامـة لبسـت عـمـه ..
والنـم كـن مـرق ..
صفقــة بتجيــب اللمــة ..
دوبـلـلـى الطــراش ..
سـواللـى جـوه الغُمـــة ..
ضـراى الكــلام ..
جــوكــر مشــاكـل اللِمـــه ..
والجيفــة أبتـلـم ..
فـوقـهـا الذباب بالشمــة ..
خيبـان القليـب ..
تابع المـهـازل همــه ..
والصفـقـه أم رقيص ..
والضحكــة ضحكــة يُـمٌــه ..
بـاقــى الشــرابـو حــرام ..
وتكمــل ســواة اللِمــة ..
وأم شـامـة زير الســوق ..
كـوز الحــديد الصـــدٌه ..
العــفـــة أبتـروح ..
والنيفيــا صبحــت حُــقـــه ..
النـاس أبتمش من الرهـو ..
كن سكن الشجـر ..
زمـن الخـريف الكــبــه ..
والســفــه أُم تفــاف ..
والله صبـحــت سِــبـــه ..
تِنـشـــال بالنـعـال ..
فـى التنـدل هـنـاك تنٌـكـبـــه ..
والحـال البميــل .. زى الخـوير ..
شبـحــة رِجــل بتعـــدٌه ..
والجحـر البجيــب الفـار ..
بـالـزِفــت العـفـن بنســده ..
والطـحـن الـدراش ..
غـربـال وبرجـع رِدٌه ..
والبـزعـل بطــش ..
حــرم تجيــه الغُـــدٌه ..
مـليـنـا الـكــلام ..
نـاس الـمـشــاط .. والعِــدٌه ..
وغـنـاى الكــلام ..
دلـوكـتو شــوك .. تِنــقــده ..
والـديـك كـان جــفــل ..
كسٌــر غســيــل العِــده ..
والفـرٌه .. قـالـت فــرررر ..
حـوش القصـب .. إنــقٌـــده ..
وشجـر العـوير بيقــوم ..
فـى مـجـرى لـو إنـســـده ..
آآآآآآآآآآآخ .. التجيــب الـحَـــزه ..
لـو كـان فـى البـلـد ..
شجــر الخــلا بيتهــزه ..
والـراجـل بقيــف ..
قفل درب الرجـوع بـى رزه ..
والخـواف كــان ركــز ..
راس مـالـو حـتة .. لـكـزة ..
كـان جـاكـم عـجـاج ..
سابق خـطـاوى الفــزه ..
والـكـوراك .. لـو ســـلاح ..
حـــرٌم .. يحــرر غــــزة ..

بنـوت الفـريق وقٌـن

سقت الحمير الليلـة للراويـة ..
بنهٌـقـوا فينـى مـن صبٌحــن ..
مـا شربـن ..
كتير بالحـيـل أظـن رويـن ..
ومـا عـلفـن ..
أمس أكـلـن ..
زرع حمـاد ..
ولد الخـالـة بت الجـن ..
صـداع ..
مـن يوم عـرس حمـدان ..
بزازى رويسـى ..
جد علقٌــن ..
مشـيـت الســوق بدور لـى حبوب ..
ومـا لاقيــت ..
أظـن كمـلـن ..
رجـعـت البيـت ..
لقيـت نـاس آمـنـه ..
مـا رجـعـن ..
لأنـو الليلـه مـع الخـالات ..
مشن يرٌحــن ..
صبـرت وقـلـت ..
أقيف فـى شـارع الله إتمَحٌـن ..
قصـاد البيـت ..
وأعـايـن للبنـات الجَــنْ ..
هـن واردات ..
بـى ألـمـى البيـت ..
شايلات فـى الرويس ..
وقٌـــن ..
ومـاشيـات وفـرحـانـات ..
ومـا تعبــن ..
سألـت حمـيرة ..
كيف الحـال ..
ضحـكـت ..
بـى خـجـل قـالـت ..
حبـاب الزيـن ..
وكيف حـال الزرع ..
أهـا ..
عيش الـدخـن لـبـٌن ..؟
وكيف السرة بت ميـدوب ..
وكيف حـال عـمـى ود تورشيـن ..
قلت حـالـهـم زيـن ..
وعيشى كتير ..
بس الطيـر ..
مـاكـل النص ..
بس لـبٌـن ..
وأمـى السـره ..
جـد تعـبـانـه ..
خـلااااااص ..
كرعينـهـا جد عِجـزن ..
وابوى تـورشيـن ..
راقـد تب ..
وعيـونو بالجـد خــلاااااااااص ..
طشـن ..
بس خـلـى العيش يطلع ..
بسـوقـهـم للحكيـم لعـلاج ..
همومـى الليلـة ..
جد كِبرن ..
وسالت أنـا ..
كيف عـمـى ود حمـاد ..
وكيـف الخـالـة بت الزيـن ..
وأخـواتك البــره مـارجـعـن ..؟
( سريع قـالـت )
عـمـك فـى تعـب يومـو ..
مـن الدغش ..
للبقـر .. حَـقٌــن ..
وزريبـة البيـت ..
وتصليحو من المطرات ..
الأمس كـبٌٌـن ..
وبـت الزيـن ..
حــييييييييييييييـه أنـا ..
بين نـار اللدايـة صبـاح ..
وبين دق الفنيـدق بُـن ..
وبين ضيـوف ( الحـاج ..)
والجنٌـون ..
وصاج وسكـن ..
والـرُكـب البقــو بطـقٌــن ..
مـاسكـة السبـحـه بتصلـى ..
فـى البنـبر .. وبتحنن ..
أخـواتى البره مـن راحــن ..
مـا كتبـن .. ( بحسـرة )
بس راجـعـات ..
قريب جـايات ..
آخـر جـواب ..
قالن لـى مشـن حـجـن ..
حميـره أرح ..
(دى العـازة ..)
بنـوت الفـريق فـاتن ..
يا العـازة .. أصبـرى خـلاص ..
أهـا يا الـزيـن ودعتك الله ..
بمشى أحصل الفــاتن ..
رجـع مـبـسـوط ..
دخـل البيت شاف طوريتو ..
والطقـطوقه
واللمبه
وعلبة بُـن ..
هنـاك كـانون ..
طبق كِسـره ..
وشـوال عيش ..
قزازة زيت ..
خـلااااص كِمـلـن ..
يا الـزيـن .. الـزيـن ..!!
(ده صـوت الحـاج )
البنـات رجعـن ..؟
لا لا الحـاج ..
مـا رجـعـن ..
يـكونن ويــن ..؟
شالـن عيش ..
مشـن يرحـن ..
نـام الـزيـن ..
بيسـمـع فـى الـرويـدى ..
غنـا ..
ومـاهـمـاهـو غير ..
زرعـو ..
وقنـدول عيش ..
خـلاص لبٌــن ..

ســلام آآنـاس ..

حـبـابـكـم زيـن .. وكيف الحـال .. طيبيـن طيبين .. ( أصـوات .. تبعث الراحـه نسمـعـهـا .. تتردد فـى اليوم آلاف المـرات .. بكـل صدق .. بلازيف .. ومـن أعـمـاق القلب .. فـى أريـاف السـودان )
سكـــووووووووووون ...

مـانامـت

رجـع نـور الفـريق لضـلام ..
وإتغطـى الـوهـج قام نـام ..
ومـا رجـعت ..
ست أم لهيـج ضوت ..
حـروف الليل ..
ومـا نـامـت ..
طريفـا كـحـيل ..
بكت ..
ضاع الكـحـل بالليل ..
وسـال أسـود ..
رسـم لـوحـه ..
فـى كف أبيض ..
صبح حـنـة ..
سكـت صـوتهـا ..
البنـاجـى الليل ..
سكـت حس السـواقى ..
الخـور ..
وصوت الريح ..
سكت حـتى الكـلب ..
الزمـان ..
نبـٌـاح ..
حمـاهـا النـوم ..
صحت ..
عـدت ..
نجـوم الليل ..
بتسمـع فـيهو ..
لحن الريح ..
يفـج القش ..
يجيـب برداً ..
يخش فـوق العـضـام ..
يهبش ..
حلـم نـام فـى زمـن تـانـى ..
جـاى من تانـى ..
ويفتش ..
وينـثـر فـى كـلام ..
الغش ..
يخت ساس البنـا ..
القام هش ..
يضـرضـر ..
فـى العيون رمـلـة ..
ويخش حـوش التكيــة القش ..
يقــولـك كش ..
قـالـت آآآآآآآآآآآه ..
زمـانـك كـان ..
تـلاقيط مـن كـلام النـاس ..
يبين للزمان الجـاى ..
مـن الصبح المـرق ضـواى ..
رويكيبـتك بقــت مـدخـل للشمس ..
رحـاى ..
و مـا غـابت ..
حـروف جــواى ..
ومـا رجـعـت ..
خـطـاوى غـنـاى ..
طـلـعـت مـن جديد الشمس ..
بس مـاتت ..
حـروف جـواى ..
سلام .. يا صبحـاً ..
بدايتو ضـلام ..
وكـل ضـلام ..
صبح مـدخــل ..
ويتخــلل ..
بصـوتو النـاى ..
خليل العـازة ..
مـا نـامت حـروف نجـواى ..
ومـا كمـلت ..
غـنـاوى الريده فـى جـواى ..

الجـوع البيحمـى النـوم

تهــدهــد فـى الجـنـا البكـاى ..
شــان يسكــت ..
تحـاحـى بتوبـهـا فـى نـامـوسـة ..
جـات ركٌــت ..
تمص فـى دمـو .. يتنكـد ..
وأمــو حنينــه .. مكـان ألمـو ..
سريـع حـكــت ..
تهــدهــد فــيهـو نــوم آآآ عـشــاى ..
عشــان يســكــت ..
ومـا يتذكــر الجـوع الحمـاهـو النـوم ..
ويتــنــكٌـــــد ..
أبــوكَ بجــى .. وأبــوك بجــى ..
يابطـلـى .. وستـر تـوبــى ..
نــوم ارقــــد ..
وقصت ليهـو قصه فاطنه السمحـه ..
مـعـاهـا الغــول ..
شـان يسكــت ..
شــوف آآآ وليــــد .. نـوم أرقــد ..
شـان مـا يجينـا ود الغـــول ..
والجنــا البكـاى .. لســه كمـان بتنكــد ..
بغيـر فـى بكـاهـو فصـول ..
وحـالف ربو مـا يسكـت ..
تهــدهـد فيـهـو شـان يرقــد ..
تفتش .. فـى كـوارى البيت ..
تفتش .. فـى صرر التياب الفاضيـة ..
مـا لاقيــة البصم خشمـو ..
تعـايـن للنـجـوم تبكــى ..
تقــول آآآ عشــاى ..
عليك الله خــلاص أسكــت ..
تنـادى الجـاره .. بالحيطـه ..
أمـونـه هـوووووى .. امـونـه ..
والشافـع لســة بتـنـكــد ..
أمـونـه .. تجيـهـا هـا يابنـيـة ..
شـن بـتدورى نص الليل ..؟
وخـبـارو وليــدك البكـاى ..
مسـاهـر الليل .. حمـانـا النوم ..
لا لا .. الـولـد جيعـان ..
كن عـنـدك طرقـة كسره ..
شــان يسكــت ..
يقــوم يرقـــد ..
والله عشيت ولادى قبيل ..
ومـا فضلت .. ولا طـرقـه ..
بكت بـدمـوعـهـا شـان يسكـت ..
وحـالف برضو مـا يسكـت ..
قريييب مـن نبــهة الأذآن ..
سكـت ..صوت الجنـا البكـاى ..
حمـدت الله إنـو سكــت ..
وقـالـت أقــوم أرقــد ..
صحـت لمـا الصبـاح أشـرق ..
دق فـى البـاب ..
بت عثمـان .. يا بت عثمـان ..
هـوووى .. مـرحــب ...!!
شـالـت توبـهـا إتلفـت ..
شـان تفتح .. للضيف البـاب ..
حــبــاب أحمــد .. كيـف الحـال ..
هـاك يابنيـة .. يمـدو جـواب ..
ده .. مـن حمـاد ..
مـصـاريفـكـم ..
أمس كـان جيـت .. بس ..
رقـدت شـويــة فـوق البيــت ..
ومـا قـادر أوصلو ليــك ..
شكــراً ليــك .. وإتفضـل ..
أشـرب الشــاى ..
لا لا .. مـاشـى اوصل أمـانـات نـاس ..
بـاقيــه مـعـاى ..
ســلام أحمـد .. وسلــم لـى فـى الرجعـه ..
عـلـى حمـاد ..
مـرق أحمـد ..
وشـالـت .. مـن الظرف ورقـات ..
تجيب لـى جـنـاهـا لبن .. ولقيمـات ..
تهـوزز فيـهـو .. آآآآمـحمـد ... آآآآمـحمـد ..
آآآمــحمـد .. قـوم .. المـصـاريف جـات ..
قـوم آآآعـشــاى ... المـصـاريف جـات ..
تـاريــهـو .. بكـاهـو الكـان ..
مـودع .. وفـات ..
يقـوم لـك ويـن .. يا حـاجـة .. وليدك مـات ..
وليـدك .. جـاع .. ومـا لقـى اللقـمـة ..
وليــدك مـــــات ..
وقــالـــت ... وووووووووووووووب ..
وشــقــت .. تــوب ..
مُت آآآآعـشــاى ... ووووب حيــيييه ..
مُت جـنـاى .. ووووب حى وووب ..
مـلـعـون الإغـتراب .. حمــاد ..
شـان لقـمـة تســد حلـقـوم ..
وجـنـانـا يـنـوم ..
مـــــايلــقـــى ..
ويمــوت مـحــروم ..
أحيييييييييي يا آآآآ مـحمــد .. جنـاى الـمـات ..
أحــييييي حمــاد ..
أريتك تب قـعـدت .. مـعـانـا .. مـا بتفـوت ..
أحــيييي أنـا .. تأمـن إنت فـوق القـوت ..
ويـحـــوم فــى ديــارنـا نـحـن المـــــــــــوت ..
أحـيييييييي ... ووووووووووووووووب ..
وليـدى يمــوت ..
شـان مـالاقــى ... ليهـو القــوت ..
أحــيييييي .. وووووووووووب ..

( صمـت .. مـا بعــده حــديـث )

بكـرة بترجـع فـاطمـه السمـحـه

وليـك أشـواقنـا بترحـل غيمـة ..
شـايلـه حنينـا ..
سنـابـل قمـحـه ..
تفتش ارضـاً ليهـا مـدائـن ..
تشــتــل فـى بينـاتهـم فـرحـه ..
كيـفـن بس ..
بتبـقـى رســـومـنـا ..
غير اللـون والريشـــة السمـحـــة ..
كيـفـن تـانـى ..
بتبـقـى حـكـاوى ..
ومـاتت قصـــة فـاطـمـه السمـحــه ..
وبـقــت الـدمـعـه تســوق القــادم ..
تقتـل فـى جـواتنـا الفـرحـه ..
والبسـمـة الكـانت تمـلا وجـوهـنـا ..
صبحت تمـرق مـن جـواتنـا بلـمـحـه ..
ياهـو طـبـعـنـا ..
ويـاهـو شكِـلـنـا ..
نزرع فـوق النـاس الفـرحــــــة ..
ونحـصـــد مـن اشــواكـهـم جـرحـه ..
ونسكــت .. ونصـبـر ..
شــان يـوم بـكـره فيهـو الفـرحـه ..
وفـيـهـو السـرحــه ..
وفيـهـو .. وفيـهـو ..
أبـقـى لبـاكـر ..
لآمـن ترجـع ..
فـاطمـه السـمـحـه ..
ولآمـن تشـرق ..
شمسـك فـرحـه ..
تلـقـى بـلادك ونيلـك وشمـسك ..
وتلقـى النـخـلـة السـامـقـه الـواقـفـه ..
بيـن النيـل ..
وتـراب الصحـره ..
وتـلـقـى الفـكـره ..
وتلقـى النـاس الختو الصخـره ..
ولسـه .. ولســه يـا يوم بكـره ..
شمسـك شـرقـت ..
ولسـه الفـكـره ..
وعـالـم نحـتت عـمـق الصخـره ..
وطـاروا القـمـره ..
وطبخوا اللحمـة بدون الجمـره ..
وجيش بيقاتـل دون مـا يلاقـى ..
بـى تقنيـة الأشـعـه الحمـره ..
ولسـه محمـد ..
راجـى السمـحـه ..
ويـنـك فـاطمـه اللسـه بتشحــد ..
طــرقــة كـســره ..
ويـن اللمـه ..
الكـانت أســره ..
ويـنـو شليلنـا الراح بينـاتهـم ..
بيـن الغـاز ..
وبيـن الفـحمـه الكـانت شجـره ..
وبيـن الأرض .التحتهـا خيـرنـا ..
ولسـه الزرع الراجــى الـمـطـره ..
وبين حـاسـوب بجيبـلـك بكـره ..
ولسـه محمـد خوفو بعـاتى ..
وصوت المـطـره ..
بين مستشـفـى نضيف ومـرتب ..
وبين شفـخـانـه ..
فـى تحـت الشجـرة ..
بس ..
فـى جـوانـا الضـو السـاطـع ..
بينـا يطــل ..
بـالنـور اللـمـحـه ..
راجـى أرضنـا ..
وسنابـل القمـحـه ..
ورجـى الغيمـه ..
التمـطـر فـرحـه ..
وراجـى ..
وراجـى ..
لآمـن تـرجـع ..
فاطمـه السمحـه ..

سهـم الســراب

فــرح البــعــاد ..
وكتــيــن يكــون أسعــد عــذاب ..
بيــن المـســامــات ينــغــرز ..
سهـم الســراب ..
وكتيــن تكــون ..
كــل الغـنـاوى السـمـحـة فيــك ..
صبحــت تقـول نـعقة غــراب ..
ورمـلـة الشــاطــى البعــيــد ..
مكـســيــة بـى لــون الضبــاب ..
ونـغـمـة الـوتـر الحنـون ..
الليلــة بتمـارس الغيــاب ..
وتــوقــف الإحســاس ..
مـعـاك ..
أصبح يباب ..
مـابيــن سكــون الفـرحـة ..
واللوم والعتـاب ..
ســاعــات زمــانك والسنيـن ..
مـرت خـواطــر الهـم عــذاب ..
فـى سكــة العشـــم الـــرِهـــاب ..
بيــن المشــاعــر ..
والتـرقــب ..
والمـدن صبحـت خــراب ..
وبقـيـت أنـا مـا بيـنـى بيـنـك ..
و الســراب ..
ألــف مـلـيــون مـيـل مـربـع ..
مـن فـرح ..
مـزروعـة بــى قـمـــحــى ..
الســـراب ..
جــايــة أحــزانك ..
بتفتح ألـــف بـــاب ..
سطـعـت بـروق ..
غيــمــك سحـاب ..
بس ...
بينـك ..
وبيـنـى ..
قصـــة دونـهـا الكـتـاب ..
وهـوة واسعــة ..
وألـــف بـــاب ..

الكـارثــة

قـامت مـن قبل الشمـس تطـلـع ..
إتوضـت .. تفتش ..
شـان مـا تزعـج النـايميـن ..
فـى التكـل الكبيــر ..
ومـا شايــل بلاهـو سرير ..
ودولاب ..
متكل فـى حـداهـو ..
حصـيــر ..
وواحـد تـانـى فيهـو ..
الأربعـة النـايميـن ..
أخواتهـا الصغـار فاطنه وعـزه ..
كلتوم و آخـر زول بنـادو ( الشـم )
وإسمـو الخـيـر ..
شالـت الفـروة مـن تحت السرير ..
صلـت ..
وقـامـت ..
بـدون تـأخـيـر ..
للحـوش .. الكبيـر ..
قشــت ..
تمـلـى الـزيـر ..
تفتش فـى الفـحـم ..
جـابت ..
مـا لقـت كبريـت ..
رافـعـهو الـوالـده مـن الخيـر ..
المـاهـاميـهـو غير النـار ..
وصيـد الطيـر ..
يخـلـع النـاس بالطبنجيــة ..
كمـل كـبريتنـا مـن البيت ..
فـى شـان الخير ..
نـادت مـن حيطـة البيت ..
خـالـتى السـاره ..
صبـاح الخيـر ..
بلاقـى عـنـدكـم كبريـت ..
أو جمـرة أولـع الكـانون ..
عشـان الشـاهـى للجنـٌون ..؟
ضحكـت السـاره قالت ليـهـا ..
حبـاب عشــة ..
كبرتـى خـلاص ..
وبقيـتى تقولى للصغـار جنٌـون ..
هـاك دى الجمـرة ..
ولـعـى الكـانـون ..
( تضيـف )
وكيف أمـك مـن تعـب الزرع ..
ودق العيش ..
وكيف الخيـر .. الجنـا المجنـون ( بضحـكـه )
والله ياخـاله هـم طيبين ..
بس نـايميـن ..
الليلــة الخير ..
بيمـشـى مـعـانـا الـمـدرســة ..
بـاقـى خـلاص .. سننـاهـو ..
شـان يدرس ..
مـع الباقييـن ..
( تمشـى تكمـل غرضـهـا )
تصحـى أخـواتهـا ..
وأمـهـا عشـان الزرع ..
شـان يشربوا الشاى ..
وشـان البنـوت .. والليــد ..
يمشـوا الــدارسه مـعـاى ..
لبسـت الفستـان ..
ولفت الطـرحـة الكوتهـا زمـان ..
وسـاقـت بقيــة الأخـوات ..
بكـل حنـان ..
آه .. لـو أبوى مـعـاى ..
وآه .. و كـان ...!!
مـامـات .. حليلوا أبوى ..
مسحـت دموعـهـا بالطـرحـة ..
شان مـا يشـوفوا ..
أخـواتهـا الحـزن فيـهـا ..
ومـا تنـقص كمـان فـرحـة ..
لقوهـا بنـات .. الفـريق الفـوق ..
لابســات الحرير ..
ضحكـن عـلـى .. والبنـوت ..
عشــة ..
والرقـعــة الظـاهـرة فـى فستـانـهـا ..
كـان مـحـروق ..
وفـى جبــة أخـوهـا الخيـر المـرقـعـه ..
مـلـطـخ فيـهـا .. سكن .. طـايوق ..
وسفـنـجـة عـزة ..
النص التـانـى كـان محـروق ..
وكـلـتوم الكسيحــة ..
بتزحـف فـى الأرض ..
ضحــكن بنـات الفـريق الفـوق ..
وقالـن ليـهـا ويـن مـا شات ..
خِـلـق زى ده ..
وضحكـن مـن جـديد ..
فـوقـن .. وفـوق الخيـر ..
بكـت عشــه ..
لأنـو الفـرق .. واضح ..
بيـناتهـم ..
وبين نـاس الفـريق الفـوق ..
قالـت لأخـواتهـا الصغـار ..
أرح سـاكـت ..
وأنسـوا الحـاصـل ..
عشـان نـدرس ونتعـلـم ..
ونسـكـن ..
نحـن كمـان الفـريق الفـوق ..
بس الخـيـر ..
رجـع بـاكـى ..
ضحـك النـاس ..
خـلـى قليبـو جــد مـحـروق ..
فـات البيـت وشـال هدمـاتو ..
كـان مـغـبـون ..
طـلـع فـات للسـوق ..
ركب لـورى .. حدا الخـرطـوم ..
ومـا رد مـن تـانـى للقـريــة ..
المـلانـه سمـوم ..
سنيـن تركب سنين فـى سنين ..
وصل زمـن السنين عشـريـن ..
ولسـة الخيـر ..
الأم بالهـمـوم ..
مـاتت ..
بعـد زوجت مـن بنـاتهـا إتنيـن ..
وبـاقـى إتنيـن ..
ومـا لحـقـت ..
رجـع بـعـد ضعـف السنين ..
وسنين ..
مستـور حـال ..
ورافـع العيـن ..
لقـى البيت الأسـاسـوا متين ..
واقـف ..
زى مـاكـان ..
لقـى عشــة ..
غشـاهـا الشيب ..
وضعـف العيـن ..
وكـلـتوم البتحبـى زمـان ..
بقت راقـده ..
دمـوع مـن دم ..
تغطـى العـيـن ..
قالت عشـه دون مـا تشـوف ..
جيت يا الخير ...؟
حبابك زيـن ..
ومـا نضمـت ..
قليبـهـا سكـت ..
ووقـعـت الأوضـه فـوق كـلـتوم ..
ووقـع الخيـر ..
وقـع مـصـــدوم ..

( وأقـفـل السـتـار )

ويـن راح ( شليل )

إتلـمـوا جنيـات الفـريـق
فـوق الرمـل نـص الطـريــق
شـان يـلـعـبـوا
إكتمـل القـمـر
والليلـة مـا ليلــة سمـر
يـوم إكتمـال دارة البـدر
نـاصـع جمــيــل
يهـديـنـا دُر
والـدارة ميــس
فـى ضــو قـمـر
ضـاع مـن زمـان
فـوق الحـضـر
شخـطـوا الأرض
جـابـوا العـضـم
أبيـض جمـيــل
شفـنـاهـوا تــب
زى الـدليـل
سمــو ( الشليل )
عــزلـوا الجـدى
رامـى الشليل
وجـهـزنـا تـب
والليل طـويــل
فـنٌ الـعـضـــم
شـق الفضـا
فـى صــوت جمــيــل
غمـضــت عيـون
سـرحـت شجــون
عــم السـكـون
صــاخ الســمـع
قــام ( طـــقْ )
وقـــــــع
وشـوفـوا الجـرى
وكــم زول وقـع
ورددنـا قــولاً جـد جميــل
بــدد سكـونـا الكـان قبيــل
وينـو الشليـــل
راح ويــن شليل
واحـد صـرخ
وبأعـلـى صــوت
قـال ليـنـا عــووووووك
يانـاس شليل
داك كـن وصــل .. للميس
جَـدِىْ وسمـو الـعـريس
يــوم الشـليــل
وشـوفـوا الصـراع
فــوق الشليل
الكـان عـضـم
يـاهـو القبيــــل
آآآه .. يـازمـن
آآه .. يــاحــليل
ويـن لـمـة الـنـاس
القبيـــل
وينـو الشليــل
راح ويـن شـليل
راح مــن قبييييييييييييييل
فـى زحمـة الـمـاضـى
الجمـيــل
والحـاضـر
المـا فيـهـو ليل
أو حتى ســاعــة
زى قبيـــل
ويـنـو الـزمـن
واللمــة ويــن
والصُحـبـه ويـن
وينـو الفـرح
وينـو الحنيـن
حتـى الـحـلـم
جـواتنـا أصبح جد سجيـن
ويـن راحـوا .. ويــن
مـا بـقـول هـنـا
ويـن راح ( شليل )
الـراح كـبيــر
والراح غــذيــر
الراح كتيـر
فـى نـفـوسنـا
مـن غيــر الشليل
فَنٌيــتْ عضـم
بس مـا وقـع
والـدنيـا ليل
وين .. الشليل
و
ي
ن

ا
ل
ش
ل
ي
ل

مـرسـال كـلام

شايف الزول هنااااااااااك ..
شايل العصى ولولاها ..
التابع المراح ...
شيال السعن للبخسه قام هزاها..
للشايله الجنا ...
فى نص الضهر قوقاها ..
يوم تربط رسن ..
فى النخره ما فى قفاها ..
يوم شاف الطشاش ..
رشا القريبه كفاها ..
العوم فى الخوير ...
كلدف رهيو سواها ..
الساس كن متين ...
الراكوبه وين لهواها ...
صعب الشجر لو قام ...
فى نص بير ورماها ..
الريح لو عرف ..
ساس البنا إتلافاها ...
كن شاف الجاقا ...
فوق للرويح حاحاها ...
سمبر نزل ..
هجليجه هز الجناح لولاها ..
كن نزل المطر ...
جوه التكل تلقاها ...
سمح القول وصل بس ..
زيدو تمو مناها

يا مطـرات الدُغش الكَـبٌنْ
يا نسـمـات الصيـفْ
الدابِنْ هبٌنْ
ياساعات اليوم التبٌنْ
تسلمْ وتسلم
لينـا
وتسـلـمْ
الـوالـداتْ التِعبنْ وربٌـــنْ
وقـامنْ
شبٌن
شِقيٌنْ
تِعْبٌــنْ
جابنْ
( مطـر الصيفْ )
دُخرى الحوبه
وكَرَم الضيفْ
اللسة مُدكٌِنْ
كَـرَم الريفْ
الواصلْ
حـد الكَرمْ القيفْ
ياكا الهِمٌة
وياكـا القِمٌة
وياكا الشايل
همْ الأمٌة
بدون تـزييفْ
وصادق كِلٌمة
حَدْ السيـفْ
ليكا سلامنا
وليك إخلاص الودْ
يا ( سـيـفْ )

أخـى وصنـو النـفس الذى تمترس بمـا تخفيه " أضلع جهتى اليسار "
أستاذنا وشـاعـرنا الفَخـمْ / محمـد زين الـعـابدين " أبوجديرى "

جِيتك بعدْ
الجِتٌة إنـهٌـدتْ
وعينْ الصحو الفينـا
الشاحِبة
إنسـدتْ
وزولكْ غمٌـدْ
تعب اليوم
الليلـة إتعـمٌـدْ
بس
رديت فـى شان الصنـو
الصافـى " أمـحُـمٌـدْ "
ود العابد زينْ
العُـمٌُـدْ
نـاس الخيـل الـراوية
السُـهٌـدْ
نـاس الكـرمْ
الـواصل
فى ظلمـاتْ الليل
للهُـجٌـدْ
نـار الضيف
لعيون الـرُمٌـدْ
برجـع باكـر
شان الجفـن
الصاحـى
يقولكْ
إنتْ " أمحُـمٌـدْ "